Hjólakraftur

Fyrir hverja er Hjólakraftur?

Hjólakraftur er fyrir alla. Helst langar okkur að hitta krakka á aldrinum 12-18 ára þó. Við erum með hópa af ungu fólki og við skiptum hópunum eftir aldri. Heldur þú að þú eigir samleið með okkur? Hafðu þá samband við Valda. Hann er yfirleitt mjög snöggur að svara pósti og hann er með netfangið valdi@hjolakraftur.com. Þú mátt líka alveg hringja í hann í síma 848-8822 eða finna hann á Facebook og senda honum skilaboð. Hann heitir fullu nafni Þorvaldur Daníelsson.


Stoltið kemur af því að sigrast á sjálfum sér, ekki öðrum, og kannski er það mikilvægasta veganestið

Hvað erum við að gera?

Það er nú í sjálfu sér alveg ótrúlega einfalt. Við erum að hjóla og við erum að hreyfa okkur. Við erum ekki í neinni keppni hvert við annað, síður en svo, en við veitum hvert öðru ágætt aðhald. Fyrsti hópurinn byrjaði í Reykjavík og núna eru hópar á nokkrum stöðum á landinu. Við hittumst fast tvisvar í viku og stundum þrisvar. Þess utan nýtum við okkur ótrúlega sniðugt leikfang á netinu eða app í símanum sem heitir Strava. Það er forrit sem heldur utan um alla kílómetrana sem við hjólum.

WOW-cyclothon

Það er ekkert leyndarmál að við ætlum okkur alltaf að vera með í WOW-cyclothoninu og helst með mörg lið. Fyrsta Hjólakrafts-liðið tók þátt sumarið 2014. Gleðin og hvatningin svo mikilvægir þættir hjá okkur því það er ekkert gaman að gera það sem er leiðinlegt. Það er sömuleiðis gríðarlega mikilvægt að foreldrar séu mikill og góður stuðningur við bæði unga fólkið okkar og hópinn. Þess vegna förum við líka af og til saman öll út að hjóla og gerum eitthvað skemmtilegt.

Facebook